賽馬會啟德水上運動中心

呢座喺啟德一帶嘅紅白色建築,前身係啟德機場嘅消防局,而家搖身一變成為香港賽馬會啟德水上運動中心——由賽馬會慈善信託基金全額捐助、香港水上運動議會管理,係全港首個將歷史建築同現代水上運動設施融合埋一齊嘅社區場地。

中心保留咗1970年代標誌性嘅紅白消防局做辦公同船艇儲存用途,再配上全新落成嘅多功能大樓,新舊建築並存都幾有睇頭。自2025年10月起為期三年嘅計劃入面,中心會不斷推出各種水上同陸上康樂活動,亦有專業培訓提升安全意識,目標係等更多香港人願意親近水、參與水上運動,將呢種生活方式帶入社區。